ਬਠਿੰਡਾ -ਸੁਹਾਗ ਦਾ ਚੂੜਾ ਪਾ ਕੇ ਕੁੜੀ ਡੋਲੀ 'ਚ ਬੈਠ ਆਪਣੇ ਪਤੀ ਦੇ ਘਰ ਤੁਰਦੀ ਹੈ, ਇਹ ਸੋਚ ਕੇ ਕਿ ਹੁਣ ਉਹ ਇਕੱਲੀ ਨਹੀਂ, ਸਗੋਂ ਉਸ ਨੂੰ ਦੁੱਖ-ਸੁੱਖ ਦਾ ਸਾਥੀ ਮਿਲ ਗਿਆ ਹੈ, ਜੋ ਮਰਦੇ ਦਮ ਤੱਕ ਉਸ ਦਾ ਸਾਥ ਨਿਭਾਵੇਗਾ ਪਰ ਇਹ ਸੋਚ ਲੈ ਕੇ ਹੀ ਬਠਿੰਡਾ 'ਚ ਸਹੁਰੇ ਗਈ ਨਵੀਂ ਵਿਆਹੀ ਕੁੜੀ ਦਾ ਹਰ ਅਰਮਾਨ ਚਕਨਾਚੂਰ ਹੋ ਗਿਆ, ਜਦੋਂ ਦਾਜ ਖਾਤਰ ਉਸ ਦਾ ਕਤਲ ਕਰ ਦਿੱਤਾ ਗਿਆ।
ਜਾਣਕਾਰੀ ਮੁਤਾਬਕ ਮ੍ਰਿਤਕਾ ਦੇ ਭਰਾ ਦੀ ਸ਼ਿਕਾਇਤ 'ਤੇ ਪੁਲਸ ਨੇ ਇਸ ਮਾਮਲੇ ਵਿਚ ਨਾਮਜ਼ਦ ਪਤੀ, ਸੱਸ-ਸਹੁਰਾ ਤੇ ਦਿਓਰ ਦੇ ਖਿਲਾਫ ਗ੍ਰਿਫਤਾਰੀ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ ਸਿਰਸਾ ਵਾਸੀ ਦਰਸ਼ਨ ਸਿੰਗਲਾ ਦੀ ਪੁੱਤਰੀ ਦੀਪਾਲੀ ਦਾ ਵਿਆਹ ਬੀਤੀ 14 ਫਰਵਰੀ ਨੂੰ ਸਾਹਿਲ ਪੁੱਤਰ ਸੰਜੀਵ ਗੋਇਲ ਵਾਸੀ ਬਠਿੰਡਾ ਪੰਜਾਬ ਨਾਲ ਹੋਇਆ ਸੀ।
ਦੀਪਾਲੀ ਦੇ ਭਰਾ ਅੰਕਿਤ ਨੇ ਦੱਸਿਆ ਕਿ ਉਨ੍ਹਾਂ ਵਿਆਹ 'ਚ ਵਾਧੂ ਦਾਜ ਦਿੱਤਾ। ਵਿਆਹ ਤੋਂ ਬਾਅਦ ਸਹੁਰੇ ਵਾਲੇ ਉਸ ਦੀ ਭੈਣ ਨੂੰ ਦਾਜ ਦੀ ਮੰਗ ਕਰਕੇ ਤੰਗ ਕਰਦੇ ਸਨ।
ਦਾਜ ਖਾਤਿਰ ਹੀ ਸਹੁਰਿਆਂ ਨੇ ਦੀਪਾਲੀ ਦਾ ਕਤਲ ਕਰ ਦਿੱਤਾ। ਸਹੁਰਿਆਂ ਨੇ ਦੀਪਾਲੀ ਦੇ ਪਰਿਵਾਰ ਵਾਲਿਆਂ ਨੂੰ ਦੱਸਿਆ ਕਿ ਉਹ ਬੀਮਾਰ ਹੈ, ਜਦੋਂ ਪਰਿਵਾਰ ਵਾਲੇ ਦੀਪਾਲੀ ਦਾ ਪਤਾ ਲੈਣ ਬਠਿੰਡਾ ਉਸ ਦੇ ਘਰ ਪੁੱਜੇ ਤਾਂ ਵਿਹੜੇ 'ਚ ਦੀਪਾਲੀ ਦੀ ਲਾਸ਼ ਪਈ ਦੇਖ ਕੇ ਹਾਕਲ-ਬਾਕਲ ਹੋ ਗਏ। ਮੌਕੇ 'ਤੇ ਮੌਜੂਦ ਪੁਲਸ ਨੇ ਉਨ੍ਹਾਂ ਨੂੰ ਲਾਸ਼ ਆਪਣੇ ਨਾਲ ਲਿਜਾਣ ਤੋਂ ਰੋਕ ਦਿੱਤਾ ਅਤੇ ਦੀਪਾਲੀ ਦੇ ਸਹੁਰਿਆਂ ਨੇ ਉਸ ਦੇ ਮਾਪਿਆਂ ਨਾਲ ਕੁੱਟਮਾਰ ਵੀ ਕੀਤੀ। ਫਿਲਹਾਲ ਪੁਲਸ ਨੇ ਸਹੁਰੇ ਪਰਿਵਾਰ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
Punjab news, Punjabi news, BBC PUNJABI,